هام للبنات تأمين حساب الفيس والبيانات الخاصة من السرقة

السلام عليكم 

موضوع النهاردة مهم جدا جدا لأى بنت بتستخدم الإنترنت عامة وبالأخص لو عندها حساب على الفيس بوك

للأسف فى الفترة القليلة اللى فاتت جاتلنا رسايل كتير من بنات تم تهكير أو سرقة حساباتهم وللأسف  فبياناتهم الخاصة اللى ما ينفعش حد يشوفها ظهرت وإتعرضت على صفحاتهم

طبعا بعض الحالات دى تم إسترداد حسابهم والبعض الاخر كان صعب إستردادها لأنهم مكنتش متأمنة كويس , وبالتالى فالشخص اللى سرقها بيقدر انه يمنع أى حد يسترجع الحساب مرة تانية ,,, وطبعا فى الحالة وعلشان الحساب يرجع لازم صاحبات البنت اللى اتسرق حسابها يعملوا حملة ريبورتات محترمة من خلال جروباتهم علشان الحساب يتقفل خالص

---

الغرض من الموضوع هو

إن كل بنت تتعلم تأمن حسابها على الفيس كويس جدا

فيه مثل بيقول الوقاية خير من العلاج ,,, يعنى المفروض إننا ما نستناش لحد ما المشكلة تحصل وبعدين نروح نعالجها لأن فى المواضيع دى حتى لو اتعالجت فبيبقى لها أثر سىء , وبالتالى فالوقاية هنا مهمة جدا جدا لعدم الوقوع فى المشكلة من أصله

---

نعمل إيه علشان نحمى بياناتنا وحسابنا

إحنا قسمنا الموضوع لجزأين

الجزء الأول : وده من باب الحفاظ على بياناتنا عامة ومهم جدا نحط الإجراءات دى فى الإعتبار
الجزء الثانى : الخطوات العملية لتأمين حساب الفيس بوك بصورة تامة

---

الجزء الأول

1. ما تبعتيش أى صور خاصة لأى حد مهما كان ثقة.( وهنقولك ليه ) :إحنا مش بنشكك فى زميلتك او اختك أو أى كان اللى بتبعتى لهم الصور , ولكن فيه إحتمالات تانية بعيداً عن الشك خالص وارد انها تحصل , وبنسبة كبيرة كمان وشفنا على ده حالات كتييرة جدا,,, فمثلا ممكن تليفونها يقع , أو يتسرق , او يبوظ ويحتاج يتصلح , أو أخوها أو ابن عمها أو زوجها يتصفح التليفون وفى كل الحالات دى من السهل ان اللى سرق او لقى او صلّح أو تصفح التليفون ياخد الصور دى ويتفرج عليها ان مكنش مريض نفسى ويبتض يبتز او ينزلها على النت
2. الأفضل من كدة ان ما يكونش على الموبايل صور خاصة ليكى : وده برده بسبب كذا حالة شفناها ان تليفونها هى اللى اتسرق أو باظ أو وقع , وعلى سبيل المثال لا الحصر يعنى دى واحدة شرعت فى  قتل صاحب محل موبايلات علشان أخد صورها وفيديوهاتها وهو بيصلحه ونزلها على النت والخبر من 2011 ( اضغط هنا لمشاهدة الخبر ) وده كمان خبر من السعودية ( إضغط هنا ) وهنكتفى بالخبر ده اللى فيه بنت بتحكى عن معاناتها بعد سرقة هاتفها ببيانتها الخاصة رغم تحذير زوجها لها كتير انها تلغى الصور من على التليفون ( إضغط هنا )

---

---

3. ما تنزليش أى تطبيقات مشبوهة أو تطبيق مش محتاجاه , لأن مفيش تطبيق بينزل على الموبايل إلا وبيتجسس على بعض او كل بياناتك وطبعا بموافقتك لأن وانتى بتنزليه بيطلب منك الموافقة على بعض الشروط وإحنا طبعا بدون أى تفكير بنقول له Ok  :) ,,, طب لو فيه تطبيق معين محتاجاه هتعملى ايه ,,, تبحثى الأول عنه على جوجل او يوتيوب وتشوفى الناس بتقول علي التطبيق ده إيه أو تسألى حد يكون عنده دراية بالحاجات دى.
4. أغلب البنات بيجيلهم صور وفيديوهات مش مناسبة من خلال اشخاص مرضى نفسيين على رسائل الفيس بوك ,,, ودول حلهم البلوك علشان ما يوصلوش لصفحتك تانى ,,, 
5. بلاش نهائيا الضغط على أى روابط مشبوهة تقابلوها على الفيس أو تصولكوا فى رسايل ,,, لأنها بتكون ملغمة ومعمولة علشان سرقة الباسوردات ,,, ومن أمثلة ده ( إلحق إكسب معانا كارت شحن ببلاش ) ( والله انا شحنت كارت بمائة جنيه مجانا الحق اشترك ) ,,, ( إشترك معانا وفوز برحلة مجانية للغردقة ) ههههه الحداية بتحدف كتاكيت :D  قال ايه رحلة للغردقة ههههههههه ,,, وطبعا البنات ما بتصدق تلاقى حاجة زى كدة  ( نقطة ضعف ) فخد بالك من ان حد يستغل نقطة ضعفكم ,,, والصورة دى بتوضح أحد أشكال الروابط دى 

---

الجزء الثانى واللى هنشرح فيه بخطوات بسيطة وبالصور وبالفيديو ان شاء الله طريقة تأمين حساب الفيس ان
شاء الله هينزل بتاريخ الأربعاء الموافق 27/6/2018

التسميات:

فيسبوك تويتر جوجل + لينكدن واتساب

ميكروبيديا

ميكروبيديا هى مدونة قام بإنشائها م حمدى سلطان لتكون نواة لأحد أهم تخصصات قسم هندسة الحاسب وهو تخصص الأنظمة المدمجة لكن سرعان ونتيجة لمتعة مادة الفيزياء ما أصبحت المدونة تستخدم لعرض كل ما يخص مادة الفيزياء للثانوية العامة ويمكنك من خلال تصفحها الوصول للشرح والمذكرات وقريبا الأخبار الخاصة بالثانوية العامة